> Zurück

Damen 1 : RTZ Bern-Solothurn 3:1

Viola Stirnemann 09.02.2020

Amne Mäntig abe hei mir üs no mit Verstärkig us dr 5. Liga, da leider immr no paar vo üsne Spielerine verletzigshalber gfäut hei u itz ono zwöi schüsch am chränkele si gsi, in Riggisberg igfunge. Mir si ner eich ziemlich guet i erst Satz gstartet, lang mit so 7-8 Pünkt im Vorsprung gsi. Plötzlech ischs nis abr nüm so eifach glunge. Viellecht hei mir nis zfest vom gägnerische Trainer la ablänke. Dä het nämlech, nachdem dr Schiri e Pass vo ihne het abpfiffe, quer übers Fäud e Diskussion mit ihre über de Entscheid wöue afa. Er het de erst nach dr Vrteilig vor gelbe Karte ufghört diskutiere u z Spiu het chönne wiitrgah. Uf jede Fau hei d RTZ-Modis plötzlech afa ufhole u mir hei am Schluss de Satz 22:25 ah si müesse abgäh.

Dr zwöit Satz hei mir niso guet chönne starte wie dr erst. Es si nis zwar immr wiedr Sache glunge, abr öpe glich viu oh ni. Mir hei nis abr oh schneu wiedr gfange, hei wiedr chli ufegfahre u so wiedr chönne Druck mache am Service u bide Agriffe. So hei mir de Satz 25:16 für üs chönne entscheide.

Dr 3. Satz isch di ganz Ziit ziemlech usgliche gsi. RTZ isch zwar immr so 2-3 pünkt im
vorus gsi, mir hei nis abr ni la abhänke. Am Schluss hei mir de nomau Vougas gäh u dr Satz no 26:24 gwunne.

So, ab i 4. Satz. Mir si scho chli müed gsi vo de länge Bauwächsle, abr vou motiviert dä Match itz heizhole. U so hei mir mit guet platzierte Agriffe u mit Druck im Service dä Satz 25:16 für üs entschiede.

U merci viu mau Alyssa u Maria, ds dir so churzfristig no igsprunge sit u füre Isatz ufem u näbem Fäud!