> Zurück

DTV Innertkirchen : D2, 3:2, 03.12.18

Frauenknecht Isa 05.12.2018

Nach ärä langä Fahrt bis i ds wytentfernte Innertkirche, sy mer i dr schön warmä Hauä ihtroffe. Mau mitem komplettä Team, hei mer guet gluunet u motiviert uf ds kommende Spiuu gluegt. Bim Ihspile u Ihschlah isch auues super gloffe u scho baud het dr Schiri dr Match apfiffe. Mir hei mit dr erste Abnahm scho ä wunderschöne Punkt gmacht. Mir sy vom erschtä Punkt aa vou im Spiu dinne gsi u mir hei definitv meh zämä gspiuut aus bim letzte Match. Punkt um Punkt hei mer für üs chönne entscheide. Nur ab u zue isch ä Schlag vo dä Gägner im Fäud glandet, ohni ds mer nä no hei chönne rettä. Mir sy fürenang gloffe, hei grüeft u jedi het ihri Ufgab wunderbar erfüut. Nid nume d Abnahm, sondern o d Päss u d Schleg sy sehr präzis gsi u ds het drzue gfüehrt ds ufem Fäud ä super Stimmig isch gsi. Mir hei dr erscht Satz rächt klar für üs chönne entscheide.

 

Mit däm säubstsichere gfüu sy mer i zwöit Satz gstartet. O im zwöite Satz hei mer villi schöni Abnahme, Päss u Schleg chönne usfüehre. Jede einzeln Punkt hei mer gfiiret u hei so o dr zwöit Satz für üs chönne entscheide.

 

Eigentlech hätti üs nach denä zwöi Sätz nüt me söuä ufhaute. Aber irgendöppis het nis chli us em Spiu gworfe u d Gägner sy nis drvo zoge. Nach u nach isch d Stimmig uf em Fäud chli dämpfter worde u jedä het nid so ganz vrstange, wieso ds es ids nümme louft. D Isa het vrsuecht, Tipps z gä u het Spilerinne gwächslet. Aber auues het nid wöue häufe u so hei d Gägner dä Satz für sich entschide.

 

"Vrgässät dä Satz, mir fö no einisch bi Null aa!" het d Isa gseit. Mit chli hängändä Chöpf, aber trotzdem überzügt, ds mer dä Match wei gwinne, hei mer dr viert Satz gstartet. Leider isch o da z Glück nid mit nis gsi! Ä früsch ihgwächsleti Gägnerspilerin het Bau um Bau bi üs im Fäud vrsänkt. Nach u nach isch d Stimmig am kippe gsi, aber trotzdäm het jedi vrsuecht d Teammitglider ufzboue u z motiviere. Leider isch eirä Innertkircherin z'wort "fair-play" nid gläufig u ds het i viunä vo üs ä gwüssi Wuet usglöst.  Schluss am End hei mer o dä Satz dä Gägner müesse gä.

 

Ids hets gheissä, dr füft Satz für üs entscheidä. Dr erscht Punkt vo däm Satz hei mer für üs chönne entscheidä u jedi isch motiviert gsi, no mau aues z gä. Leider sy mer aber nid würklech is Spiu ine cho u äs het nümme wöue klappe. So isches cho, ds mer dä Match trotz däm Vorsprung vo zwöi Pünkt am Schluss vrlore hei.

 

Mit hängendä Chöpf u enttüschte Blicke sy mer vom Fäud gange. Keni vo dä Spilerinne u o d Isa het vrstange, wie ds het chönne passiere. Trotz derä Niderlag hei mer aui realisiert, ds es Wäutä sy zum letzte Match u ds mer defintiv glich chöi stouz sy, ds mer zmingst ide erschtä zwöi Sätz super gspiuut hei. Stouz chöi mer defintiv o sy, ds mer trotz dä unfaire Handlige vo dä Gägner geng fair sy blibe.

Für ä nächst match müesse mer eifach luege, ds mer ds Gfüuu, di Fröid u ds Zämäspiuu vo dä erschtä zwöi Sätz chöi biphaute u denn dr Sack zue düe u gwinne.

 

- Melea -