> Zurück

Volley Köniz - Da3 (2:3)

Christina Stucki 04.03.2019

Juhuii ändlech hei mirs wirder gschafft, mir hei gwunne!

 

Scho bim Iispile isch d Stimmig super gsi, aui hei enang aagführet. U scho vo afang ah hei mir üsi guete bäu gfiiret.

 

Mir hei super chönne starte im erste satz, ir Mitti mau si si üs punktemässig chli necher cho. Mir hei üs aber nid la beunruhige u hei dä Satz mit 25:17 gwunne.

 

Im zwöite Satz hei mir o ume guet gstartet, aber üsi Gägner äbe o. Es isch geng rächt usgliche gsi mit de Pünkt. U gäge Schluss ischs no richtig es Chopf a Chopf-Renne gsi. Mir hei kämpft bis am Schluss aber leider ischs de Gägner glunge die entscheidende Pünkt z mache. Dr Satz isch 26:28 usgange.

 

Sichtlech gstercht vo däm gwunnene Satz si üsi Gägner sehr säubstbewusst wider zrugg uf ds Fäud cho. Bi ihne ischs gued glüffe u bi üs hets eifach nümme so richtig wöue. Mir si zwar dranne gsi, aber es het eifach nid glängt. Mir hei zu 23 verlore.

 

Mir hei üs das nid wöue la gfaue. Im vierte Satz hei mir no einisch richtig uftreit u Punkt um Punkt gmacht. Dr Satz isch 25:13 usgange

 

Eifach no fertig mache hets itz gheisse. Zum Glück hei mir o im letschte Satz wider schnäu ids Spiu gfunge. Mir hei dominiert u o dä Satz no für üs entschide (15:5)

Froue das het ändlech wider so richtig gfägt!

Danke viu mau Nina für si Iisatz, es isch super gsi.

 

Resultat: 2:3 (17:25, 28:26, 25:23, 13:25, 5:15)