> Zurück

Damen 3 - VBC Münsingen (1:3)

Sarah Habegger 05.03.2019

 

Am Mäntig Abe hei mir dr dritt Match innerhaub vo vier Täg gha. Zudem isch es no dr letzt vo derä Saison gsi. Darum si mir top motiviert ir Haue ihtroffe und hei no ä letzte Sieg gäge Gruppeletzt wöue ihhole.

Im erste Satz hei mir scho gli gmerkt, dass es nid so eifach wird wie mir am Ahfang hei dänkt. Mir si no nid so wach gsi und si bi viu Bäu ä Schritt z’spät gsi. Oh mit üsnä Ahgriffe hei mir nid grosse Druck chönä usüebe und so hei nis am Schluss vier Pünkt gfäut um dä Satz z’gwinne.

Mir si chli besser ih zwöit Satz gstartet und hei äs paar Pünkt Vorsprung uf üsä Gägner chönä usähole. Doch das Polster hei mir scho gli wieder müesse abgäh. Mir hei viu Servicefähler gha und üs schwär tah, d’Löcher bi üsne Gägner z’finge. Darum hei mir leider oh bim däm Satz aus Verlierer vom Platz müesse.

Itzä hei mir dänkt aues oder nüt. Und das hei mir när oh gmacht. Ändläch hei mir gueti Ahgriffe gha und oh ir Verteidigung si mir wach gsi. So hei mir dä Satz zu 18 gwunne und si itzä parat gsi um ä 5-Sätzer z’spilä.

Wie im dritte si mir oh im vierte Satz super gstartet. Mir hei Pünkt gmacht und hei scho gli ä grosse Vorsprung gha. Doch plötzläch si üsi Gägner wieder da gsi und mir si nis scho fasch z’sicher gsi, dass mir dä Satz gwinne. Sie hei Punkt um Punkt gmacht und mir hei die Bäu wieder nüme ah Bode bracht, was oh ar super und schnäue Verteidigung vo Münsinge isch gläge. So hets leider müesse cho, dass Münsinge dä viert Satz und somit dr Match gwunne het.

Trotz derä letzte Niederlage und dr nid so super glungene Rückrundi hei mir gueti Momente und tolli Spiu gha. Mercii aune für dä gross Ihsatz ih derä Saison.

 

Resultat 1:3 (21:25, 17:25, 25:18, 20:25)