, Blatter Nadine

Damen2 - Köniz Lerbermatt, 1:3, 27.10.2012

Ou üse zwöit Match vor Saison heimer für üs chönne entscheide. Nach däm mir scho vo anderne Quellene verno hei, dass Köniz sehr starchi Service het, heimer üs natürlech optimal im Training uf das chönne vorbereite. Üsi Gägnerinne sie nid nur einiges grösser gsi, sondern ou rund 10 Jahr jünger aus mir. Vo däm heimer üs aber nid la verunsichere und so simmer nä ou mit grosser Motivation i erst Satz gstartet. Mir si wach und ufmerksam gsi, hei die zum Teil sehr herte Bäu guet chönne verteidige! Mi hets richtig gspürt, dass mir hie wei zeige wär die besser si! D'päss sie sehr guet verteilt worde und mir hei nä us däm ou klever agriffe. Dr Satz heimer nä 15:25 gwunne. Mit der gliche Ufstellig simer nä i 2 Satz gstartet. Köniz het uftreit und mir si im erste moment grad chli überfordet gsi. Mir hei itz zgspüre becho, was ebe mit dene guete Services gmeint isch gsi. Es isch üs grad nüm so gloffe, mir si nüm so wach gsi und hei ou doofi Fähler gmacht. Passend zu däm Satz het de zReslutat 25:20 gheisse. Im 3 Satz heimer nä wieder richtig afa kämpfe, es isch hert gsi und mir hei längi Bauwächsle ga. Der gägner isch itz äntgültig erwachet. Aber zKämpfe hetsech glohnt, so heimer dä Satz knapp aber verdient gwunne. (26:24) Im 4 Satz heimer super guet agfange, si aber nä ibroche und hei üse Vorsprung abgä. Mir si 4 Punkt im Rückstand gsi. Dank üsere super Teamleistig heimer aber ou de Satz 23:25 gwunne. Super Leistig gsi.

Der erst Schnee isch gfaue und mir hei üse zwöit Match gwunne. :)