, Frauenknecht Isa

D2 - VC Uettligen, 0:3, 18.01.2014

Neus Jahr, neus Glück. Nacherä doch sehr länge Winterpouse simer am Samsti Morge am 10:50!!!! Vor der Turnhalle zÜetlige gstande.
A Match ir Vorrundi heimer üs aui nur ungern dra erinneret, drum heimer no mau üses Glück wöue versueche.
Mit viu Motivation simer i erst Satz gstartet. Das feine Festesse, die viele Güetzli und Schoggichugle si üs viellech no chli schwär ufgläge. Mir si leider grad zimmlech i Rückstand cho und der Gägner het de doch sehr schnäu 7:1 gfüehrt. Mir hei üs aber ufgrafft und de doch no bis 8:8 ufghout. Leider het das grad gar nüt bracht. Üettlige het üs zimmlech überrumplet, sehr guet abgno und so isches üs schwär gfaue pünkt zmache. Mir hei de Satz nä 12:25 verlore. Mir hei leider nachere erfougriche ufhoujagt nur 4 Punkt wiiteri chönne mache. Schade.
Trotzdäm hei mir der Chopf nid la hange und hei doch nomau es schöns Volleyball füre gno. Leider nid zschönste, da mer nid so starch Agriffe hei, wies bi üs schüsch der fau isch. Konsequenz drus isch när ou gsi, das mer de Satz leider wieder zimmlech klar verlore hei (25:13).
Mir hei nüt me zverlüre ga, EG het aui no la spile wo vorhär näbem spiurand hei agfüret&drum no äs bitzli chaud si gsii. Ganz angers aus erwartet hei mir aber no mau richtig vougas gä. Mir si sogar i füehrig gange und hei richtig kämpft und paar längi Bauwächsle de ou für üs chöne entscheide. Es isch e knappi Sach gsi. Doch zum Schluss isch haut üse Gägner eifach besser gsi und mir hei de ou dä Satz knapp verlore (25:20).