, Stucki Maria

Volley Papiermühle - D2 (0:3)

Die schwierige Mätsche gäg d Gägner us der vordere Tabäuehäufti si Gschicht, leider ke wahnsinnig erfougriichi. Umso meh hei mer üs gfreut, ändleche wieder mau gäg öpper us üser Tabäue-Nachberschaft azträtte. Guet gluunt si mer z nünt aträtte. VoPap het zwöuf Spilerinne im Ufgebot gha. Demonstriere si Überlägeheit? Mau luege!

Mir si grad mit ere Service-Serie i erst Satz gstartet. Juhui, das tuet guet! Wie mer so si, hei mer aber üser Gägnerinne wieder la ufrücke. Das gits ja nid! Chnorze mir itz da o scho wieder desume? Nei, so schlimm wirds nid. Es glingt is zwar nid aus, aber mir chöi üs doch nadisnah chli absetze u dä Satz relativ suverän "heitue". Zu 18 chöi mir dä Satz für üs entscheide.Üsi Konzentration isch o uf dProb gsteut worde, wiu VoPap bi öppe sächs vo sibe Blocksprüng o no grad ds Netz het mit de Arme wöue ufenäh. I gloube, die wüsse no nid, dass das i der Saison nümm erloubt isch! Aber das gieng em Änd no, we nid o d Schiedsrichtere ganz grosszügig über das hinwäggluegt hätt! Drum mahnet üs d Isa, d Pünkt mit üsne Agriffe z erziile u nid mit de Fähler vo VoPap.

Überzügt, dass mir das schaffe, stige mer i zwöit Satz. Zersch handle mir üs afe e saftige Rückstand ii. Zum Glück glingt üs öppe ir Mitti vom Satz dank ere nöie Service-Serie der Aaschluss u mir lö de nümm la abrönne. Mit viu Überzügig gö mer Punkt für Punkt vorwärts. Vou Überzügig geit o d Sarah a ds Wärch. Wow, die knallt de ihre Service hüt perfekt über ds Netz! Aber o weh, si cha d Schiedsrichtere nid mit ihrer Säubstsicherheit tüüsche! D Grundlinie wär äbe die blaui zwe Meter witer hinger gsi! So lustigi Vorfäu ghöre mängisch o derzue. Jedefaus geit dä Satz zu 19 a üs.

Es fougt der dritt u meistens schwirigscht Satz. Mir si gli i Füehrig u löh o wieder na. Das kenne mer ja scho. Hüt muess eifach chli gwärchet si für e Erfoug. I maches churz: Mir chöi dä Satz mit 25:21 heitue u gniesse üse erst Vouerfoug i dere Rückrundi i voue Züg! Itz chöme mer sogar no zu gnädiger Zyt i ds Bett!