, Stucki Liliane

Dame 1 - VBC Schwarzenburg 3:0

Zum Spiu vo letzter Wuche gägä Aarberg gits nid so viu z sägä. Mir hei zitewis guet gspiut, aber zitewis o viu z viu Bäu kassiert. I jedem Satz isches am Schluss knapp wordä u glich het Aarberg ds Spiu 3:0 gwunne u sech so scho früech dr 1. Rang i üsere Gruppe gsicheret. Glichzitig het Konolfinge gäge Schwarzeburg gwunnä, was drzue het gfüehrt, dass Konolfinge üs ir Rangliste itz ordentlech Druck macht. 

Mir hei versuecht z Guete usem Aarberg-Spiu mitznäh und dr Fokus uf di kommende Spiu zlegä. Am Samsti 15.02. si d Frouä vom VBC Schwarzeburg zu üs uf Riggisbärg cho. Us de letztä gfüeut 100 Spiu gägä si, wüsse mir, dases gägä Schwarzeburg immer e riise Kampf isch und viu längi Bauwächsle z erwarte si. Mir si topmotiviert u zimlech närvös gsi. D Isa (wo hüt dr Jönu het verträte) het üs aber mit ufe Wäg gä, dassmr söuä ruhig blibä, Spass ha u üs uf üses Spiu konzentriere. Dr Match het agfange... ...Agriff, Block, Block, Agriff... und es isch 4:0 für Schwarzeburg gstangä. Itz heimer definitiv gwüsst, dass mir müesse erwache und Gas gä. Das isch üs zum Glück de o glungä. Mir si immer besser ids Spiu cho, hei üs o vor bländendä Sunnä nid la drusbringä, Punkt für Punkt gspiut u so dr erst Satz für üs entschide.

Dr zwöit Satz isch e churze Chut gsi. Zämegfasst; üs isch viu glückt u drzue het sech Schwarzeburg mit viune Eigefähler säuber usem Spiu gno. Dä Satz heimer mit 25:10 gwunnä.

Mir hei gwüsst, dassmer gägä d Froue vo Schwarzeburg ke Schwächi dörfä zeige und o im dritte Satz vou konzentriert müesse blibä. Üsi Gägnerinne hei ufdräit u mir hei villech o nüm ganz so souverän gspiut, wi no im Satz drvor. Es isch du ömu plötzlech 23:17 für üsi Gägnerinne gstange. Im Timeout het d Isa gseit; si sig zu jedem Zitpunkt überzügt, dass mir dä Satz no holä. U so simer zrüg uf z Fäud, hei Punkt für Punkt ufgholt u obwohl Schwarzeburg bi 24:21 3 Satzbäu het gha, het d Linda souverän uf 24:24 usglichä. U o we üsi Gägnerinne när nomau zumne Satzbau si cho, mir hei üs nid la verunsichere, hei für jede Bau kämpft u schliesslech het d Sarah mit zwe souveräne Service dr Match zu üsne Gunste 3:0 entschide. 

 

Merci Isa für dis Coaching, di motivierende u ufmunternde Wort u di Gloubä i üses Team! Es het mega gfägt u isch schön gsi, hei aui d Chance übercho, dörfä zspilä! I gloub mir aui hättä gägä Schwarzeburg kes 3:0 erwartet. Umso glücklecher simer, heimer das z stang bracht. Itz geits witer, nächste Friti spile mir gägä d Frouä vo Thun - mir erwarte o dert es spannends Spiu u hoffe, dassmer ar Leistig vom Schwarzeburg-Spiu chöi achnüpfä!