, Benkhanous Tanja

Damen 2 - VBC Uni Bern (1:3)

Am Samschtig 17.10 isch es oh entlech für üs los gange mit dr nöiie, chlii andere Corona-Saison. No chli ungwohnt mit Maske hei mir im Gang vor der Turnhalle gwartet bis ds vorhärige Spiu vo üsem U23 isch fertig gsi u mir id Haue hei dörfe. Nach em gwonte warm up si mir super ih erscht satz gstartet. Mir hei viu gred uf em fäud u jede Punkt gfiiret u so hei mir dr erscht Satz zimelch ungfärdet mit  25:13 gwunne. Üs isch aber scho nach em Gwinn vom erschte Satz klar gsi, das es wahrschinlech nid so easy wird witer ga, wüu Uni Bern doch oh viu eigefähler gmacht het.

U so isch es cho Uni Bern het im zwöite Satz ufträiit, het sini eigefähler massiv minimiert u het jede bau no zrügg bracht. D`Lili het üs am Ahfang ermahnt mir dörfi jetzt nid zu uberhäblech werde. Leider si mir immer drü, vier Pünkt hinger Uni Bern gsi u si am Schluss nüme häre cho. So het dr zwöit Satz 19:25 zu gunste vo Uni Bern gändet.

Dr dritt Satz isch ziemlech ähnlech zum zwöite gsi, Uni Bern het nüme viu Fähler gmacht u bi üs isch d lockerheit ä chli wäg gsi u mir hei dr eint oder ander eigefähler zviu gmacht. So hei mir dä Satz mit 16:25 abgä.

Im vierte Satz ischs när nomau richtig spannend worde. Nach däm Uni Bern lang immer mit zwöi, drü Pünkt isch vore gsi, het Prisca ä super Service-Serie häre gleit u bis 24: 20 serviert. So mir hei drü Satzbäu gha.  Aber es het när leider nid söue si, Uni Bern het auii chöne abwehre u wo´s när 24:25 isch gstande hei si dr Sack chöne zue mache u schluss am End dr viert Satz mit 24:26 gwunne.

Nichts desto trotz isch´s sicher ä guete Start gsi ii die nöii Saison u mir hätte dä eint Punkt sicherlech verdient gha. U jede vo üs isch froh gsi chöi mir oh jetzt ih dere Corona Zit üsere Lideschaft nache ga.
Drum isch um so besser geits am Zischtig scho wieder witer gäg Status Köniz u mir he dChance zGlück uf üsi Site z zwinge.

Resultat: Damen 2 - Uni Bern 1:3 (25:13, 19:25, 16:25, 24:26)