, Stucki Christina

Status Köniz - Damen 2 (1:3)

Am Dsistiabe hei mir üs z Chäsitz versammlet. Trotz nöiem Name hei mir autbekannti Gsichter aatroffe. Scho mänge match hei mir gägenang gspiut u scho geng isches sehr usgliche gsi.

Eigentlech hätte mir ja z Burebüebli erwartet zum iispile. Aber si hei ihri Playlist mittlerwile doch scho chli modernisiert.

Am Afang vom erste Satz hei mir üs grad nid so rächt chönne iifinge ids Spiu. Nachemne erste Time-Out wo üsi Trainerinne üs ungeregfüüret hei, ischs de viu besser gange.
Nid nume d Gsichter vo üsne Gägnerinne hei sech über d Jahr weni veränderet, o d Spiuwiis hei mir nume au zu guet kennt. Si si drfür bekannt, dass si z Spiu guet chöi läse u drum o geng guet stöh. Si mache chuum Eigefähler u schiesse aber gärn o mau dr erst oder zwöit Bau direkt wider übere.

Da hei mir üs, zersch wider chli müesse dra gwahne. När hei mir aber guet chönne mit ha. Es isch geng chli es Chopf-a-Chopf-Renne gsi. Schlussendlech hei mir dr Satz aber für üs chönne entscheide.
Mir si guet i zwöit Satz gstartet. Nachemne Zitli hets aber eifach grad nümme so wöue. Mir hei irgendwie dr Chopf la hange u si hei no chli uftreit. Spetistens itz hei mir gmerkt wie wichtig, dass d Stimmig isch i däm Match. Mir heis gschafft üs wider ufzraffe u witer üses Spiu düre z zieh. Gäge Schluss isches nomau sehr äng worde, mir heis leider nid gschafft di entscheidende Bäu däne a Bode z bringe. So hei mir dä Satz ihne müesse überlah.

Eis isch klar gsi, e füfte Satz u es Punkt abgäh chunnt für üs nid i Frag!
So si mir i dritt Satz gstartet. Am Afang hets aber wider nid si ganz wöue. Es het wider mau es Time-Out brucht, dass mir richtig hei chönne starte. Aber när hei mir uftreit. Es isch geng chli usgliche gsi, aber mit gnue Coolness u ere guete Stimmig uf üsere Site hei mir dä Satz für üs chönne entscheide.

I letscht Satz si mir guet gstartet, 10:1 hei mir gfüehrt. Es paar Pünkt hei mir schono müesse abgäh. Aber mir hei dä Satz souverän chönne düre zieh!

Mir blibt nume no eis z säge: "Dir sit mega cool!"

Damen 2 : Satus Köniz 3:1 (26:24, 25:27, 25:23, 25:18)