, Frauenknecht Nina

D3 - VBC Münsingen (0:3)

Vo Münsinge hei mir eigentlech nid gwüsst, wie si wärde spiele und uf was dasmer müesse gfasst si. Mir hei üs eifach vo Afang ah gseit, mir wei üses Spiu spiele und üs bim Agriff chli öpis wage. Leider het das mitem gwagte Agriff am Afang vom erste Satz nid super klappet. Nachem Timout vor Nina hei mir üs aber gsammlet u nomau Vougas gäh. So hei mir glich no chönne Druck und no einigi Pünkt mache. Glängt hets när leider glich nid ganz u mir hei dä Satz 19:25 müesse ah d‘Gägner abgäh.Scho gli hei mir gmerkt, dass mir ono chli gäge Schiri müesse kämpfe. Sie het ouso praktisch jede, viellecht minim unsuberä Pass vo üsne Passeusene abpfiffe. Dsmer hie nid bi de Profis si, sondern ir 5.Liga, isch haut äue gad vergässe gange.

Dr zwöit Satz, no chli mitere angere Ufstellig/Spielerbsetzig, isch prägt gsi vo Uf und Abs. Wo Münsinge scho im 20er Punkteberich isch gsi und mir d‘Konzentration hei afa verlüre, het d Nina üs mitemne Timeout Ziit gäh, üs wieder z’sammle. Mit dä Gedanke scho bim nächste Satz und düre so verursachte Druckverlust, hei mir no eh souveräni Ufhoujagd chönne starte. Ganz glängt hets ner leider glich nid, hei aber hert kämpft, so ds dä Satz 23:25 ah Gägner isch gange.

Mit dr Hoffnig, viellecht ja glich no eh Satz für üs chönne z entscheide, simer i dritt Satz gstartet. Leider het doch de d Konzentration scho chli afa nah lah und so hei Münsinge gad recht schneu eh ziemleche Vorsprung chönne erarbeite. Üsi Abnahme hei gad nüm so wöue suber si u so hei mir oh nüm so Druck chönne mache wie no Ändi zwöite Satz. Drum het Münsinge dr letzt Satz no 16:25 gwunne.  

Aues i Auem si d Ändresultat üsem Spiuniveau definitiv nid grächt, so wie bi de letzte Matche oscho. Oh wemer dä Match 0:3 verlore hei, simer glichwou mitemne guete Gfüuh us dr Haue. Da möge mir doch de Gägner eigendlech Niveaumässig definitiv d Stange haute, löh üs aber geng chli vo üsne Chöpf usem Konzept la bringe und chöi mitem Druck no nid ganz so guet umgah. De funktioniere äbe Sache, wo mir doch eigentlech chöi, plötzlech glich nüm so richtig (jaja di cheibä Gratisbäu). Mir freue üs ömu, bim Wiedersehe mit de Mannschafte vo dene hert umkämpfte Niederlage vor Vorrundi de ir Rückrundi hoffentlech dr eint oder anger Match für üs chönne z‘entscheide.