, Stucki Maria

D3-TV Länggasse 3:1

Trotz Samstig si mir wäg diverse Abwäseheite nume z'sibet gsi. Mir heis gwüsst u si mental druf vorbereitet gsi. D Tanja isch churzerhand zur Mitti Agriffere worde u d Usseagrifferinne hei einisch kes Gerangel um die zwe Spiuplätz gha. Das isch scho ewig nümm vorcho.

Guet gstimmt u ufgsteut si mer iiglüffe u hei üser Matchvorbereitige konsequänt u doch unverchrampft dürezoge.

Mir si i ds Spiu gstartet u hei gloub e Premiere gha... Mir si nämlech scho vo Afang a wach gsi!!! Würklech!!! Läbig, agil u konzentriert hei mer losgla. Da isch sogar dNina i ds Stuune cho! Punkt für Punkt hei mer uf üses Konto chönne bueche, ohni dass mer bombemässig agriffe hätte. Aber mir si ufmerksam gsi u hei hartnäckig verteidiget u ab u zue e Wunderbau im änere Fäud platziert. D Froue vom TVL si chli konsterniert gsi. Es isch ne weni glunge u öppedie hei sech Eigefähler iigschliche. U de ihre einzig Fän, wo isch mitcho...! Dä het o no für üs gschaffet! Er het "siner" Froue unheimlech unger Druck gsetzt. Da hei mir nume dankbar chönne schmunzle! Gäg Ändi vom Satz hei mer plötzlech no chli Abstimmigsproblem ir Abnahm gha. D Närve hei o no wöue mitspile! Aber ds Pouschter, wo mer üs hei erarbeitet gha, het guet glängt. (25:21)

"Witer so, Froue!" het üs d Nina afangs vom zwöite Satz mit uf e Wäg gä, "die angere mache de d Fähler scho!" U wie üses Team isch, mir fouge üsem Coach! Würklech! Es het gfägt, das Mau hei mer mit unerschrockenem Spiu scho gli e satte Vorsprung erarbeitet gha u dir gloubets nid, fasch die haube Pünkt si üs dür di gägnerische Eigefähler gschänkt worde. Das söu aber d Teamleischtig nid schmälere. So Fähler passiere nume, we me o gnue Druck cha usüebe u die angere zur Verzwiiflig bringt. Mit dere satte tadulose Arbeit uf em Fäud u dr begeischterete Ungerstützig vo usse hei mir dä Satz mit 25:12 im Sack gha.

Villech hätt me grad nüt söue ändere u villech hätt o das nüt gnützt... Dr 3. Satz isch sim ominöse Ruef grächt worde. Mir hei dr Druck nid chönne ufrächterhaute u d Froue vom TVL hei vergässe Eigefähler z produziere u es isch cho, wie s het müesse. Mit paarne wunderschöne Agriffe hei sie üs zeigt, was sie de o no druff hätte u mir hei 17:25 iigluegt. 

Im vierte Satz hei mer üs wieder i ds F.... gchlemmt u ume a die erschte beide Sätz chönne achnüpfe. Mir hei üs Punkt für Punkt erschaffet u mit behärztem Iisatz verteidiget, ja u zwüschedüre wieder vermehrt uf d Fähler vom TVL chönne zeue. 25:18

(Eigentlech hätt me pro Satz geng nume ume erscht Punkt müesse spile. Es het geng das Team dr Satz gwunne, wo dr erscht Punkt het glandet. Es wär auso uf ds Gliiche usecho!)

Tja, so fägts! Er Nina danke mer härzlech für ihrer Tipps. So langsam schaffe mer di Sache o im Match umzsetze, wo sie üs scho lang iitrichteret.Witer so!

U itz gniesse mer mindestens zwe Tag lang die wunderbari Zwüschetabäue! So öppis isch üs no gar nie passiert...!