, Christina Stucki

VBC Uni Bern - Damen 3 (3:2)

Vouer Elan si mir am Samstig Mittag ir Turnhaue aacho. Mir si parat gsi für Iizloufe, doch leider het dr Match vor üs chli lenger duuret, es ist 1:1 gstange wo mit eigentlech hätt wöue afah u wis z erwarte isch gsi hei die zersch mau no bis i füft Satz gspiut.

Mir hei du afe im Gang afa iiloufe u hei schlussendlech mit ere haub stung Verspätig gstartet.

Grad vo Afang ah ischs glüffe wie verruckt, aus isch üs glunge, dä Gägner drfür umso weniger. I gloube bau si si no chli am schlafe gsi. Ruckzuck hei mit dä Satz zu 11 hei ta.

Scho zwüsche de Sätz het d Nina üf vorgwarnt, "die chöi sicher no meh u wache de no chli uf". U so ischs gsi, im Zwöite Satz hei si üs fasch chli überfahre, da si ganz angeri Bäu drhär cho u üs hets drfür wider chli weniger wöue glinge. Mir hei versuecht üs z wehre aber es het eifach nid wöue. 16:25 hei mir verlore.

Wider zrugg uf dr Gwinner-Site ischs wider chli meh so glüffe wie mir üs das eigentlech vorsteue. Dä Satz isch 25:16 zu üsne Gunste usgange.

Da mir ja sooo gärn Volley spile hei mir gfunge mir chöi nid scho nach vier Sätz höre. Dass mir no e 5. hei chönne spile, hei wider si müesse gwinne. U so ischs gsi, zwar knapp aber haut glich zu 21 hei si üs gschlage.

Im füfte Satz si mir zersch mau vorab eigentlech hei mir es guets Pouster gha, aber si heis doch no gschafft üs ufzhole. Es het eifach irgendwie nümm wöue, leider hei si o dr letscht Satz no gwunne. 9:15 ischs usgange. Sone Seich, aber nächschts mau loufts de wider besser!

 

Resultat 3:2 (11:25, 25:16, 16:25, 15:9)