, Michelle Schlachter

TV Längasse - Damen 3 (3:0)

Am Mäntiabe am 8i hei mir im Muristalde gäge TV Länggass gspiut. Scho bim ispile si mir vouer Motivation gsi u hei ä gueti Stimmig gha im Team. 

 

Dr erscht Satz hett zimlech guet agfange. Bi jedem Punkt wo mir für üs hei chönne entscheide hei mir gjublet wie no nie. Leider hei mir mitti Satz ä chline Hänger gha wo üs d‘Anahme nid so glunge si. Obwouh mir dür das fasch 10 Pünkt hingedri si gsi, hätt me chönne meine mir sige am gwinne, sone gueti Stimmig hei mir ufem Fäud gha! Grad wäge dere Stimmig hei mir ner oh nomau chönne richtig ufhole. Trotzdem hei mir dr erscht Satz 21:25 verlore. 

 

Mit der gliche Motivation si mir i 2. Satz gstartet. Leider hei mir aber chli viu Eigefähler gah und nüm ganz so guet kommuniziert u dür das viu Pünkt verschenkt. Trotzdem isch d‘Stimmig no super gsi und gäge Schluss hei mir nomau chönne ufdräie u hei paar schöni Agriffe gha. Es hett aber leider nid glängt u mir hei dä Satz 16:25 verlore.

 

Im dritte Satz isch es üses leider lang gar nid glunge iz Spiu inez‘cho. Mir heis nid gschafft schön ufz‘boue u hei dür das oh gar nid chönne Ahgriffe. Denn hett oh di gueti Stimmig chli abgnoh. Wo me scho hätt chönne denke dr Match sigi verbi hei mir aber nomau richtig ufdräit. Mir si für jede Bau gange, hei cleveri Ahgriffe gspiut u üsi Gägner la sekkle. Üsi Teamstimmig isch wieder ufem Höhepunkt gsi. Mir hei jede Bau gfiret u no zimlech ufghout: Am Schluss isch 17:25 füre TV Länggass gstange.

 

Obwouh mir auso dä Match 3:0 verlore hei, isch es ä super Match gsi. Mir hei viu glachet, üs gfröit über jede Punkt u so viu Spass gha. 

I hoffe mir bringe i dä nächschte Matche genau sone Stimmig häre wie mir i dem Match hei gha!

 

Resultat 3:0 (25:21, 25:16, 25:17)