, Nadine Stähli

Dame 3 - Uni Bern (2:3)

Dä hüttig Match isch mau öbbis ganz bsundrigs gsi. Äs het scho ahgfange mitr Fasnacht, wo z’Riggisberg noch richtig gfiiret wird u mä aube fasch nüm zur Haue chunnt. Aber zum Glück fingtme ja no angeri Wäge dert häre. Wieter gange ischs de mitr Frag, mit was für Libli mir wärde spiele, da üsi eigetleche Matchlibli bi öbberem deheim si gsi, wo ni ah Match isch cho. Wüu mir de glich liebr i früsche Libli hei wöuä spiele, heimr üs de entschiede, zum Teu die aute vor 5. Liga z’näh + no paari vo de Ispiulibli, womer haut no mit Nummere hei müesse usstatte. A Kreativität hets üs ämu ni gfäut. Was oh no spezieu isch gsi hüt, isch d’Team-Konstellation. Wäge Ferie, Chrankheit & Schaffe simer vom eigetleche Team grad mau uf 5 reduziert gsi. Zum Glück si d Sara usem U23 & d Selina us dr 4. Liga cho ushäufe. U oh ä angere Coach heimr hüt gha: d’Nina het wäge ihrem Konzärt nid chönne cho, auso het d Viola die Ufgab übernoh.

Bevor mir aber hei chönne ispiele, heimr no mitem Dame 1 mitgfieberet, wo denn grad d Ufhourundi het gstartet. Ir vorgwermte Haue heimer de nach ihne chönne verchürzt ispiele. Da heimrs gschafft, konzentriert gueti Bäu z’spiele. U mir hei Stimmig chönne ufboue. Eifach die ufkläbte Nummere uf de paar Libli hei lieber i dä Haar wöuä chläbe, aus ufem Stoff.

Mit 15 Minute Verspätig isch dr Ahpfiff cho. Am Afang het aber grad gar nüt wöuä gah. D’Ahnahme si hüfig zweni gnau gsi & d’Ahgriffe nid so cho. 10:25 heimr de dä Satz verlore.

Im 2. Satz heimr de meh chönne zeige. Aber äs het glich nid glängt. Punktestand 20:25.

Vouer Motivation dä 3. Satz z’gwinne u dr Sieg no z hole, heimr super i dä nöi Satz gstartet. D’Froue vo Uni Bern hei meh Müeh gha u üs isch meh glunge. Das het üs grad so beflüglet, dassmr sä 25:13 hei la stah. Genau so heimr wöuä wieterfahre im 4. Satz. «Itz weimr i 5 Sätz gwinne u ar Prisca ä Geburi-Sieg schänke», heimr üs gseit. Oh dä het wieder sehr guet gstartet u mir hei d Füehrig übernoh. Gäge Schluss simr aber de chli närvös worde u d Bärnerinne hei chönne ufhole u sogar überhole. Bim Spiustand 22:23 het d Viola ä strategische Wächsu vorgno, wo sehr guet isch ufgange. Mir hei üs dä Satz mit 25:23 ghout u üs so richtig drüber chönne fröie!

Wieter so im 5. Satz, heimer eigetlech wöuä. Leider simer am Ahfang wieder nid gnue parat u agil gsi. Bim Sitewächsu heimr no ke Punkt gha. Irgendwie heimrs de glich no gschafft, 8 Pünkt zhole. Aber füre Sieg hets leider wiedermau nid glängt.

Äs isch sicher ä schwierige Match gsi, mit so viune angere Sache. Aber mir hei sehr viu gschafft! Mir si 2:0 im Rückstand gsi u hei glich no so guet kämpft! Die Mentalität vom 3. & 4. Satz sötte mir chönne biphaute. Mir chönnte so viu erreiche mit dere Istellig! U z’Fröie nachem 4. Satz! Hoffentlech chöimer genau das no ah di letschte Matche mitnäh u när no grad mau chli meh gäh. De chäm das sicher wieder mau zumne Sieg.

Äs riesigs Merci ad Viola, d’Sara & d’Selina wo üs hüt hei usghulfe.

Resultat 3:0 (10:25, 20:25, 25:13, 25:23, 8:15)