, Schlachter Michelle

VBC Papiermühle a - Damen 2 (3:1)

Am Mäntiabe spät hei mir üse zwöit Match gha, dises mau usswärts und zwar in Ittige gäge VBC Papiermühli. D’Linie ufem Turnhauebode hei zersch mau für Gsprächstoff gsorgt, da die nid ganz so guet erkennbar si gsi. Obwouh mir bim Ispile vou derbi si gsi, hei mir bim Start vom 1. Satz grad ä chli müeh gha i z’Spiu inez’cho und üs z’motiviere. Es isch würk dr ganz Satz düre chli harzig gsi und mir hei üsi Leistig leider nid chönne abrüefe. 25:22 isch z’Ändresultat vo däm erschte Satz gsi, zwar knapp aber trotzdem nid ziuentsprächend.  

Dür paar Spielerwechsu hett d’Liliane chli ä früsche Wind uf z’Spiufäud bracht u das hett oh ganz guet klappet. Der Ufbou hett vo A-Z gstume: Ä Anahm uf z’zwöiehaub, ä perfekte Pass und BUM; ä Schlag u dr Bau isch am Bode gsi. Und oh wenn nid, de isch es direkt witergange und mir hei kämpft bis mir dr Punkt hei chönne mache oder de hei mir üs grad dr nächscht Punkt vorgnoh. Oh paar super plazierti Bäu id Egge oder d’Mitti hetts gäh u so hei mir dr 2. Satz 18:25 gwunne.  

Bim dritte Satz hei mir eigentlech oh no guet gspiut, aber irgendwie hetts immer wieder Momente gäh, wo mir umeghüschteret hei unds irgendwie nid härebracht hei vou derbi z’si u eifach üses Spiu dürez’zieh. Mir heis probiert, aber es hett schlichtwäg hinger u vore nid glängt für dä Satz chönne z’gwinne.  

Und oh im vierte Satz isch es wieder ä chli so witergange, mir hei paar sehr schöni Bauwächsu gha u trotzdem hei mir üs immer wieder chli inegfunket und eifach nid üsi eigeti Ufgab gmacht. Es isch de no sehr knapp worde, aber leider hei mir oh dä Satz verlore, nämlech 26:24. Mir si würklech chli me aus Einzuspieler uf däm Fäud gstange, anstatt aus Team, wo sech unterstützt und motiviert. Mir hei zwüschezitlech so komisch gspiut, wie mirs eigentlech i aune Trainings nie hei gmacht. Iz wüsse mir ämu was mir nid wei u chöis bim nächschte Match definitiv wieder besser machen! Merci trotzdem viu mau fürd Ungerstützig vor Selina und Anja, wo üs vou agführet hei und natürlech oh merci dir Liliane für z'coache, oh we du wahrschinlech am Fäudrand fasch verzwiflet bisch. 

Resultat 3:1 (25:22, 18:25, 25:19, 26:24)