, Bühlmann Sara

Damen 2 - VBC Uni Bern (1:3)

Am Samstignamittag, 16.11.19, si mir in Riggisberg gege VBC Uni Bern atrete. Motiviert und zueversichtlech si mir i erst Satz gstartet. Mir hei Müeh gha, d Aspiel vo üsne Gegnerinne schön abznäh und hei dementsprechend vieli Gratisbäu müesse überespile. Leider hei mir der Start chli verschlafe und dä Satz schlussendlich 16:25 verlore.

Im zwöite Satz si mir ufgwache und hei schöni Ballwechsle gha. D Abnahme si präziser fürä cho und üs isch der Ufbou besser glunge. Leider hets trotzdem knapp nid glängt und mir hei o dr zwöit Satz müesse abgä (23:25).

Ufgä hei mir aber nid, im Gegeteil: Mir hei ufdreit und chöne Punkte. Mit 25:21 hei mir der dritt Satz gwunne.

Mit viu Fröid hei mir der viert Satz i agriff gno. Mir hei guet mit üsne Gegnerinne chönä mithalte und hei kämpft. Leider hets aber am Schluss nid ganz glängt dä Satz für üs z entscheide (21:25).

Für üse erst Sieg hets ou am Samstig nid glängt. Mir müesse a üsne Abnahme und ar Kommunikation schaffe. Die gueti Stimmung und üsi Motivation näme mir mit i nächst Match gägä Köniz am 24.11.2019.

Danke a aui Zueschauer fürs cho luege und merci für euchi Unterstützig :)

Resultat 1 : 3 (16:25, 23:25, 25:21, 21:25)