, Stucki Maria

VBC Köniz - Damen 2 (1:3) Endlich!!!!!

Zmitts am Sunntig si mir ir Haue z Chüniz iitrudlet. Mir (bishär 0 Punkt us 4 Spiu) träffe ufe Gruppeletscht (natürlech o 0 Punkt). Nach vier verlorne Spiu muess itz eifach e Sieg häre!

Im erste Satz isch ganz viu ganz guet glüffe. Mir hei d Bäu schön chönne platziere u si gfasst gsi uf das, wo vo äne cho isch. Scho gli hei mer e beruehigende Vorsprung gha u dä Satz einigermasse suverään heibracht. (25:16)

Dr Afang vom zwöite Satz hei mer scho chli verlaueret, de aber nadisnah wieder e Vorsprung usegspiut. Leider hei mer üses Spiu nümm so clever dürezoge. Mir wei ja nid zviu Energie verschwände, schiinbar! Schad, passe mir üs geng wie meh am Gägner aa! Scho chli weniger klar, aber doch no sicher hei mer 25:20 gwunne.

Im dritte Satz het d Abstimmig u d Ufteilig uf em Fäud hüüffig gfäut. Mir hei nis sehr viu Servicefähler gleistet u itz het Chüniz nümm so viu Eigefähler produziert wie vorhär. Vo üs schön platzierti Bäu hei sie no usgrabe, sech tapfer verteidiget u üs mit plumpe zwöite Bäu scho i ds Schwitze bracht. Es isch äng worde, aber Chüniz het doch dr lenger Schnuuf gha u 25:21 putzt.

O im vierte Satz ischs hert uf hert gange. Ds Niwoo isch üsserscht mässig gsi. Viu Eigefähler hie u da u nach wie vor Unklarheite ir Fäudufteilig hei verhinderet, dass mir dütlech hätt chönne dervozieh. Nach em ne Hänger ir zwöite Heufti vom Satz, hei mer de doch no ds bessere Ändi uf üsere Site gha u zerscht Mau i dere Saison dörfe e Sieg bejuble! (21:25)

Itz hoffe mer no uf e nes erfougriichs letschts Spiu ir Vorrundi! Auso Gas gä, Froue!