, Hirsbrunner Jasmin

VBC Riggisberg – VBC Marzili 2:3 (25:18, 19:25, 25:22, 25:17, 7:15)

Am Fritig 27.02.20 hei mir üses Spiel gäge VBC Marzili gha. Es isch ä spannende Match gsi
und es Chopf a Chopf renne wo bis uf 5 Sätz gange isch. Nachem 2:2 isch dr letscht Satz
leider vomne Unfau trüebt gsi und mir hei d’Haue de mitemne 2:3 verlah.
Nachem Iloufe und Ispiele isch am haubi nüni ouscho dr Startpfiff ertönt. Mir si passiv i erst
Satz gestartet und no zweni parat gsi. Baud aber heimer üs gfasst und voue Isatz zeigt. Ar
Liliane ihri Ratschläg heimer umgsetzt was het Würkig zeigt und es si paar sehr starchi Schläg
z’stand cho. So heimer dä Satz erfougrich für üs entschiede.
Im zwöite Satz heimer wieder Müeh gha vo Afang ah üsi besti Leistig füre z’hole. Es het
eifach grad nideso wöue wie mir das gärn gha hätte und üsi Gägner hei nid locker gla. Mir
heinis de probiert z’fasse und wieder entschlossener z’spiele. Das ischnis super glunge, mir
hei wieder starch gspiut und zeigt wasmer chöi, ou wes zum Ufhole nümme ganz glängt het.
Nachdäm dasmer im dritte Satz zersch im Rückstand gsi si, heimer viu Konzentration und
Durchhautevermöge zeigt undnis Punkt für Punkt i Füehrig kämpft. Das hetsech glohnt und
mir heinis riesig gfreut dä Satz für üs chönne z’entscheide.
Dr viert Satz isch vo Höchs und Tiefs prägt gsi. Irgendwie heimers nid gschafft direkt dert
witerzmache womer im dritte Satz ufghört hei. Mir hei kämpft undnis Müeh gä aber es het
leider nid glängt. Üsi Gägner hei i däm Satz eifach chlei stercher gspiut.
Ou we aui langsam es bizi müed gsi si, simer vouer Ehrgiz i dä letscht und entscheidend füft
Satz gstartet. Mir hei das Spiu für üs wöue entscheide und nomau Vougas gä. Scho nachde
erste paar Spiuzüg hetsech ä Teamkollegin vo üs schmärzhaft verlezt. Das isch am ganze
Team nid spurlos verbi gange. Während sech d’Spielerinne ufem Fäud so guet wie müglech
hei probiert ufts Spiu z’fokusiere, heisech die usserhaub um die Verletzti kümmeret. Mir
wünsche ihre aui ganz gueti Besserig! Ou wesnis dasmau füre Sieg knapp nid glängt het,
simer trotzdem stouz uf die tolli Leistig womer i däm Match erbracht hei.