, Augsburger Fiona

VBC Thun - VBC Riggisberg 3:2

Dä Resultat isch ds entnäh, dasses zum Teil sehr knapp isch worde. D Bauwächsle si ungloublech lang gsi, sodass der Schlusspfiff ersch zirka 2,5 Stund nach Matchbeginn isch gfaue. Ds Spiu het aune Spilerinne bi beidne Teams viu abverlangt.
Bekanntlecherwiis isch d Konzentration bi üs im Dame 1 unger der Wuche eher schwirig. Trotzdäm heisi sehr guet gspilt und hei viu Rückständ wo äbä die Konzentration nacheglah het wider chönne ufhole. Aus Zueschouerin hani mim Team wöue häufe i däm dassi erstens mau mitere heisere Stimm bi is Bett glägä. Tatsächlech isch ds Riggi Publikum trotz uswärts Match fasch i Überzahl gsi und het da üses Team mental chönne unterstütze und d Gägnerinne chli usem Konzept chönne bringe. Zwöitens hani probiert die Löcher bi Thun ds finde. I bi uf ds Bänkli gstande ir Hoffnig e bessere Überblick ds becho und äbä die mögleche Orte, womer chöi punkte usedssueche, leider erfolglos. D Thunerinne hei sehr guet verteidigt und mir hei zittewiis grossi Schwirigkeite gha dä Punkt für üs zgwinne.
Im letztä Satz het ds Publikum uf Thunersitte de doch no afa fänä, was üs, oder ömu mi, während dä Bauwächslä, extrem gnärft het. Es het sini würkig gha, leider zu Ungunste vo üsem Team. Schlussändlech simer aui sehr müed, ou enttüscht, aber o erliechteret, dasses es Ändi gfunde het, us der Halle.
Eh nu, i ha gärn zuegluegt und i fröiemi, wenni o wider mit öich ufem Fäud stah.
 
 
25:22, 23:25, 15:25, 25:19, 19:17